💥पूरग्रस्तांना शासकीय मदत बँक खात्याऐवजी रोख रकमेच्या स्वरूपात द्या - सचिन सावंत

 💥या अगोदर वेळोवेळी नैसर्गिक आपत्तीच्या काळात शासनाने रोख रकमेच्या स्वरूपात मदत केली होती💥

✍ मोहन चौकेकर



मुंबई दि. १० ऑगस्ट/राज्य शासनाने राज्यातील पूरग्रस्तांना मदत म्हणून १५४ कोटी रूपये देण्याचा निर्णय घेतला आहे. मात्र ही रक्कम पूरग्रस्तांना बँक खात्यात देण्यात येणार आहे. पूरग्रस्त भागातील गंभीर स्थिती आणि सलगच्या सुट्ट्या पाहता पूरग्रस्तांना ही मदत वेळेवर मिळणार नाही. त्यामुळे शासनाने आपल्या निर्णयात बदल करून बँक खात्याऐवजी पूरग्रस्तांना रोख रक्कम द्यावी अशी मागणी महाराष्ट्र प्रदेश काँग्रेस कमिटीचे सरचिटणीस व प्रवक्ते सचिन सावंत यांनी मुख्यमंत्र्यांना पत्र लिहून केली आहे.
यासंदर्भात बोलताना सावंत म्हणाले की, या अगोदर वेळोवेळी कोणत्याही नैसर्गिक आपत्तीच्या काळात शासनाने रोख रकमेच्या स्वरूपात मदत केली होती. परंतु यावेळी मात्र शासन निर्णयानुसार सदर मदत ही पूरग्रस्तांचा वैयक्तिक बँक खात्यावर जमा करण्याचा निर्णय घेण्यात आला आहे. संपूर्ण संसार उद्ध्वस्त झाले असताना बँकेचे पासबुक अथवा कागदपत्रे मिळतील न मिळतील अशी परिस्थिती आहे. अद्याप लाखो लोक बेघर आहेत. सांगली, सातारा, कोल्हापूर जिल्ह्यातील पूराचे पाणी अद्याप ओसरले नाही. अशा अडचणीच्या काळात तात्पुरत्या गरजा अधिक असतात या मानसिकतेमध्ये पूरग्रस्तांना बँकांच्या वा-या करायला भाग पाडणे योग्य नाही. तसेच पूरस्थितीमुळे बँका उघडतील की नाही हे माहित नाही. त्याहून महत्त्वाचे म्हणजे या आठवड्यामध्ये पाच दिवस बँकांना सुट्टी आहे. त्यामुळे सरकारने घेतलेला निर्णय चुकीचा असून त्यात बदल करून पूरग्रस्तांना बँक खात्याऐवजी रोखीने मदत दिली तर ती लवकर पूरग्रस्तांपर्यंत पोहोचेल असे सावंत म्हणाले...

✍ मोहन चौकेकर