💥परभणी येथील रामकृष्ण नगरात धाडसी घरफोडी ; १ लाख १४ हजारांचा ऐवज लंपास...!

💥नवामोंढा पोलिस स्थानकात श्रेया देवदत्त देशपांडे यांनी दिलेल्या फिर्यादीवरुन गुन्ह्याची नोंद💥 

परभणी (दि.०४ जुन २०२२) :  शहरातील वसमतरोडवरील रामकृष्ण नगरात अज्ञात चोरट्यांनी धाडसी घरफोडी करून १ लाख १४ हजार २८० रूपयाचा ऐवज अज्ञात चोरट्यांनी लंपास केल्याची घटना शुक्रवार दि.०३ जुन २०२२ रोजी उघडकीस आली. नवामोंढा पोलिस स्थानकात श्रेया देवदत्त देशपांडे यांनी दिलेल्या फिर्यादीवरुन गुन्ह्याची नोंद करण्यात आली आहे.

         ३१ मे २०२२ ते १ जून २०२२ दरम्यान चोरट्यांनी श्रेया देशपांडे यांच्या आई राहत असलेले रामकृष्ण नगरातील घर फोडले. यात चांदीचे दागिने, पितळी वस्तु, सीसीटीव्ही कॅमेर्‍याचे साहित्य आणि रोख ४० हजार रूपये असा एकुण १ लाख १४ हजार २८० रूपयाचा मुद्देमाल चोरून नेला. घराच्या समोरील दरवाजाचे कुलूप तोडून चोरटे आतमध्ये शिरले. बेडरुममध्ये ठेवलेले साहित्य चोरट्यांनी पळविले. या प्रकरणाचा अधिक तपास सहाय्यक पोलिस निरीक्षक कवाळे करीत आहेत.

        दरम्यान, मागील काही दिवसापासून शहरामध्ये विविध भागात चोरट्यांचा धुमाकुळ सुरु असून अज्ञात चोरट्यांनी शहरातील यशवंत नगरात निलेश राठोड या शिक्षकाच्या घरीही चोरी केली आहे. यात एलसीडी टीव्ही, सात तोळ्याचे दागिने, रोख ३० हजार रूपये असा एकुण ४८ हजार ५०० रूपयाचा मुद्देमाल चोरीला गेला आहे. याप्रकरणीही  नवा मोंढा पोलिस ठाण्यात गुन्हा दाखल झाला असून पोलिस हवालदार पवार तपास करत आहेत....