🌟भागवत पंथ व धर्माचा उगम भगवान बुद्धाच्या विचारातून झाला आहे - भंते डॉ.उपगुप्त महाथेरो

🌟 डॉ.उपगुप्त महाथेरो यांच्या मार्गदर्शनाखाली महाआम्रवन येथे बुध्द मूर्तीच्या पायाभरणीचा कार्यक्रम संपन्न 🌟 

परभणी/जिंतूर (दि.२९ जुलै २०२४) :- भागवत पंथ व धर्माचा उगम भगवान बुद्धाच्या विचारातूनच झाला आहे असे प्रतिपादन अखिल भारतीय भिक्खू महासंघाचे कार्याध्यक्ष पुज्य भदंत डॉ.उपगुप्त महाथेरो यांनी केले.

         वर्षावास प्रारंभ तथा आषाढ पौर्णिमेचे औचित्य साधून आम्रवन महाविहार देवगाव (फाटा) येथे आज सोमवार दि.२९ जुलै रोजी सकाळी ११.३० वाजता तथागत भगवान गौतम बुध्द यांच्या मूर्तीची पायाभरणी  व धम्मदेसनेचा कार्यक्रम आयोजित करण्यात आला होता. त्याप्रसंगी ते बोलत होते. यावेळी अध्यक्षस्थानी माजी आमदार रामप्रसाद बोर्डीकर व उद्घाटक म्हणून जिंतूर- सेलू मतदार संघाच्या आमदार सौ. मेघना साकोरे-बोर्डीकर यांची उपस्थिती होती. यावेळी प्रमुख मार्गदर्शक म्हणून भदंत-शरणानंद महाथेरो, डॉ. उपगुप्त महाथेरो, भदंत पय्यरत्न थेरो, भदंत मुदीतानंद  थेरो, भदंत पय्या बोधी थेरो, भदंत शिलरत्न थेरो, भदंत शिवली शाक्य पुत्र, भदंत रेवत बोधी, भंते पय्यावंश, भंते संघरत्न आदींची उपस्थिती होती......

यावेळी डॉ.उपगुप्त महाथेरो यांनी तथागत बुद्धीच्या महिमेची व त्यांच्या धम्माची महत्ती विशद करत भागवत धर्म व पंथाची निर्मिती ही बुद्धाच्या विचारधारेतूनच निर्माण झाल्याची माहिती दिली. संपूर्ण आशिया खंडात तथागतांच्या विचाराचा पायंडा पडला असून देशाच्या प्रत्येक ठिकाणी भव्य अशा बुद्धाच्या मुर्त्या उभ्या राहत असल्याचे सांगून जपान मध्ये चारशे फूट उंचीची मूर्ती थाटात उभी आहे. संपूर्ण जगाला या मुर्त्या शांतीचा, करुणेचा अहिंसेचा संदेश देत सबंध मानव जातीच्या कल्याणासाठी प्रेरणाच देत असल्याचे त्यांनी म्हटले. कित्येक दिवसांपासून पावसाची रिपरिप सुरू आहे.परंतु, आ. मेघना बोर्डीकरांच्या नावातच मेघ असल्याने कार्यक्रमात मेघ गर्जला पण बरसला नाही, अशी कौतुकाची थापही त्यांनी आ. बोर्डीकरना दिली. तसेच पू. भंते संघरत्न यांनी या उभारणीच्या कामासाठी घेतलेल्या पुढाकाराचे त्यांनी कौतुक केले.

               यावेळी माजी आमदार बोर्डीकरांनी उपस्थितांना मार्गदर्शन केले. या बुद्ध मूर्तीचा लोकार्पण सोहळा संपन्न होईल, या परिसरासह जवळच असलेल्या खंडोबा मंदिराच्या परिसराचे सुशोभिकरण करण्याससुद्धा बोर्डीकर परिवार वचनबद्ध असून सर्वच परिसराचा  चौफेर विकास केला जाईल, असे आश्‍वासन दिले. येणार्‍या विधानसभे दरम्यान तथागताचे आशीर्वाद घेऊनच दीदी आपला विधानसभेचा फॉर्म भरेल असेही त्यांनी म्हटले. या कार्यक्रमाची प्रस्तावना पू.भंते संघरत्न यांनी केली. आपल्या भाषणात त्यांनी महाआम्रवन येथे आमदार  बोर्डीकरांच्या संकल्पनेतून व माजी आमदार रामप्रसाद बोर्डीकर यांच्या मार्गदर्शनात येथे उभारण्यात येत असलेल्या बुद्ध मूर्ती व सर्व परिसराच्या विकासाची सविस्तर माहिती त्यांनी दिली.

             या कार्यक्रमास उपासक व उपासिकांची मोठ्या संख्येने उपस्थिती होती. यावेळी अनुसूचित जाती जमाती मोर्चाच्या वतीने  रामप्रसाद बोर्डीकरांचा व पंचशील महिला मंडळ व सावित्रीबाई फुले महिला मंडळाच्या वतीने आमदार बोर्डीकर यांचा सत्कार करण्यात आला. डॉ. पंडित दराडे, प्रमोद चव्हाण, गोपाल रोकडे, गोविंद थिटे, विलास भंडारे यांचाही सत्कार करण्यात आला. कार्यक्रमाचे सूत्रसंचलन प्रवीण वाकळे यांनी केले. यशस्वीतेसाठी अनुसूचित जाती मोर्चा तालुकाध्यक्ष विजयकुमार वाकळे, जिल्हा सरचिटणीस सुमेध सूर्यवंशी, विकास अण्णा मोरे, गुणीरत्न वाकोडे, युवराज घनसावध, अक्षय सूर्यवंशी, विजय खंदारे, संदेश भालेराव, रविकिरण गजभारे, भगवान साळवे, अरुण गजभारे, बंडू गायकवाड, रोहिदास खंदारे, प्रतीक खिल्लारे, मुकुंद काळे, रमेश चव्हाण, सिद्धार्थ वाकळे, अमोल वाघ, राहुल शिंदे, शिवाजी वाकळे यासह असंख्य भीमसैनिकानी परिश्रम घेतले.

* महाविहार आम्रवन हे शांतीचा संदेश देणारे केंद्र ठरेल :-

              महाविहार आम्रवनाचे हे पवित्र स्थळ भविष्यात सर्वच समाज बांधवासाठी शांतीचा, समृद्धीचा संदेश देणारे केंद्र म्हणून नावारूपास येईल, असे मत आमदार सौ. मेघना बोर्डीकर यांनी व्यक्त केले. या पूर्ण जागेच्या विकासासाठी बोर्डीकर परिवार कमी पडणार नाही, साहेबांनी पूर्ण मतदारसंघात, गावोगावी डॉ. बाबासाहेबांचे पुतळे उभारण्याचे काम केले आहे, कारण की, आपली भावी पिढी त्यांच्याकडे पाहून ‘शिका, संघटित व्हा व संघर्ष करा’ ही प्रेरणा घेत राहतील. आपल्या सर्वांगीण विकासासाठी आम्ही सदैव तुमच्या पाठीशी उभे राहू, आपणही आम्हाला पाठबळ द्यावे, असे आवाहन आमदार सौ. मेघना बोर्डीकर यांनी केले.