🌟नांदेड साऊथ सेंट्रल रेल्वे विभागांतर्गत येणाऱ्या पुर्णेतील 'रेल्वे डिझेल घोटाळा' दडपण्याचा आत्मघाती प्रयत्न ?

🌟पुर्णा रेल्वे डिझेल घोटाळ्यावर उपस्थित होणाऱ्या गंभीर प्रश्नाचे उत्तर विभागीय व्यवस्थापक देतील काय🌟

🌟वरिष्ठ अधिकारी करताय 'कागदी गांधीवादी धोरणाचा' अवलंब ? : डिझेल घोटाळ्यातील आरोपींना क्लिनचीट देण्याचाही नालायकपणा🌟

✍🏻'परखड सत्य' :- चौधरी दिनेश (रणजित)

साऊथ सेंट्रल रेल्वे नांदेड विभागांतर्गत येणाऱ्या पुर्णा रेल्वे जंक्शन स्थानकावरील रेल्वे डिझेल डेपोतील कोट्यावधी रुपयांच्या रेल्वे डिझेल घोटाळ्याच्या मालिकेचा परभणी जिल्हा स्थानिक गुन्हें शाखेच्या पथकाने मागील २९ जानेवारी २०२४ रोजी दैठणा पोलीस स्थानकाच्या हद्दीतील सिंगणापूर येथील वालूर फाटा परिसरातून रेल्वेला डिझेल पुरवठा करणारे डिझेल टँकर क्रमांक एम.एच.२१ बीएच ३९४४ हे डिझेल टँकर जवळपास ५ हजार ५०० लिटर रेल्वेच्या मालकीच्या चोरीच्या डिझेलसह ताब्यात घेत पर्दाफाश करण्याची अत्यंत उल्लेखनीय कामगिरी बजावली सदरील प्रकरणी परभणी लोकसभा मतदारसंघाचे संसद सदस्य खा.संजय उर्फ बंडू जाधव यांनी दि.०८ फेब्रुवारी २०२४ रोजी संसदेत शुन्य तासात प्रश्न उपस्थित करुन केंद्रीय रेल्वे मंत्रालयाला या कोट्यावधी रुपयांच्या रेल्वे डिझेल घोटाळ्याचे गांभीर्य लक्षात आणून देण्याचा प्रयत्न केला यानंतर रेल्वे मंत्रालयाने या पुर्णा रेल्वे डिझेल डेपोतील डिझेल घोटाळा प्रकरणी १५ फेब्रुवारी २०२४ रोजी दक्षिण मध्य रेल्वे नांदेड प्रशासनाला तीस दिवसात संपूर्ण अहवाल सादर करण्याचे निर्देश जारी केले परंतु या कोट्यावधी रुपयांच्या डिझेल घोटाळ्यावर दक्षिण मध्य रेल्वे नांदेड विभागातील अधिकाऱ्यांनी देखील सोईस्करपणे पडदा टाकण्याचेच काम केल्याचे निदर्शनास येत आहे.

पुर्णा जंक्शन रेल्वे स्थानकावरील डिझेल डेपोतून मागील अनेक वर्षांपासून सातत्याने सोईस्कर रित्या होणाऱ्या डिझेल चोरी प्रकरणात डिझेल डेपोत कार्यरत अधिकारी/कर्मचारी यांच्यासह वरिष्ठ अधिकाऱ्यांचे देखील हात बरबटलेले असल्यामुळेच हा कोट्यावधी रुपयांचा डिझेल घोटाळा दडपण्याचा प्रयत्न केला जात असल्याचे दिसत असून या डिझेल प्रकरणाचे दक्षिण मध्य रेल्वे प्रशासनातील वरिष्ठ अधिकाऱ्यांना यत्किंचितही गांभीर्य नसावे ही निश्चितच गंभीर बाब म्हणावी लागेल रेल्वे मंत्रालयासह रेल्वे प्रशासनाच्या नियमानुसार रेल्वे डिझेल डेपोत डिझेल टँकर खाली करीत असतांना डिझेल आवक/जावक दर्शवण्यासाठी लावले गेलेल्या मिटरसह (Flow Meter) सिसीटीव्ही कॅमेरे देखील चालू असणे आवश्यक असतांना मिटरसह (Flow Meter) सिसीटीव्ही कॅमेरे पुर्णपणे बंद करुन सुनियोजित पद्धतीने कर्तव्यावर असलेल्या कार्यरत डिझेल घोटाळेबाज मुख्य आरोपी आरसीडी मुख्य अधिक्षक माधव बलफेवाड (पुर्व रेल्वे सुरक्षा बल कर्मचारी),आरसीडी सहाय्यक अधिक्षक मोहम्मद इस्लाऊद्दीन उर्फ मोबीन,डि.कृष्णा आरसीडी चिफ लोको इन्स्पेक्टर,ओएस कांचन कुमार या रेल्वे डिझेल चोरी प्रकरणातील आरोपीतांनी सोईस्कररित्या डिझेल घोटाळ्याची मालिका चालवल्याचे उघड झाल्यानंतर देखील साऊथ सेंट्रल रेल्वे डिव्हीजन नांदेड मधील वरिष्ठ अधिकारी संबंधित घोटाळेबाजांना वाचवण्याचा केविलवाणा प्रयत्न करीत आहेत ही बाब निश्चितच गंभीर म्हणावी लागेल.

पुर्णा रेल्वे डिझेल डेपोतील डिझेल घोटाळा प्रकरणातील आरसीडी मुख्य अधिक्षक माधव बलफेवाड (पुर्व रेल्वे सुरक्षा बल कर्मचारी),डि.कृष्णा आरसीडी चिफ लोको इन्स्पेक्टर,ओएस कांचन कुमार यांना या गंभीर प्रकरणात जामीन मिळाला असला तरी या प्रकरणात एक आरोपी असलेले आरसीडी सहाय्यक अधिक्षक मोहम्मद इस्लाऊद्दीन उर्फ मोबीन अद्यापही चौकशीला सामोरे जाण्याऐवजी कायम जामीनासाठी उच्च न्यायालयाच्या औरंगाबाद खंडपीठात धडका मारत असल्याचे निदर्शनास येत असून तात्पुरत्या जामीनावर असलेल्या आरसीडी सहाय्यक अधिक्षक मोहम्मद इस्लाऊद्दीन उर्फ मोबीन यांना पुढील सुनावणीसाठी सन्माननीय उच्च न्यायालयाच्या औरंगाबाद खंडपीठाकडून २२ ऑगस्ट २०२४ तारीख देण्यात आली आहे दरम्यान पुर्णा रेल्वे डिझेल डेपोतील या कोट्यावधी रुपयांच्या डिझेल घोट्याळ्याची सिबीआय चौकशी अत्यावश्यक असल्याने व नमूद प्रकरणातील आरोपींसह त्यांच्या नातेसंबंधातील लोकांच्या नावावरील कोट्यावधी रुपयांच्या संपत्तीच्या जप्तीसाठी सदरील प्रकरण प्रवर्तन निर्दशालयाकडे वर्ग करणे अत्यंत आवश्यक असतांना वरिष्ठ अधिकारी कागदी गांधीवादी धोरणाचा अवलंब करीत या डिझेल घोटाळ्यातील आरोपींना क्लिनचीट देण्याचा नालायकपणा करीत असल्यामुळे या प्रकरणात जनहीत याचिका दाखल होण्याची शक्यता आहे.

🌟संशयित सिसीसी चेपुरी सुरेशला तात्काळ क्लिनचीट : पुर्णा क्र्यु-बुकींग लॉबीचा कारभार पुन्हा आरोपीताच्या हाती ?

पुर्णा रेल्वे डिझेल डेपोतील घोटाळ्यानंतर मेकॅनिकल स्टोअररुम लागलेली आग : डिझेल घोटाळा प्रकरणातील रेकॉर्ड अर्थात पुरावे सोईस्करित्या नष्ट करण्याचा प्रकार तर नव्हे ना ? या प्रश्नावर ही आता चर्चा कुचर्चांना सुरुवात झाली असून मुख्य कर्मीदल अधिक्षक चेपुरी सुरेश संशयाच्या भोवऱ्यात सापडले असतांना व डिझेल डेपोतील डिझेल चोरीसह मेकॅनिकल स्टोअररुम जळीत कांड प्रकरणी संशयाच्या जाळ्यात अडकल्यानंतर व चौकशीच्या आदेशानंतर कुठल्याही प्रकारची चौकशी नकरता संबंधित मुख्य कर्मीदल अधिक्षक चेपुरी सुरेश यांना तात्काळ क्लिनचीट देऊन त्यांना पुन्हा पुर्णा क्र्यु-बुकींग लॉबीचा कारभार सोपवणे यात निश्चितच काहीतरी गुपीत दडले असल्याचे निदर्शनास येत आहे.

💥 पुर्णेतील रेल्वे डिझेल डेपोतील डिझेल घोटाळ्यावर उपस्थित होणाऱ्या या गंभीर प्रश्नाचे उत्तर विभागीय व्यवस्थापक देतील काय :-

🔴 पुर्णा रेल्वे डिझेल चोरी प्रकरणी आतापर्यंत किती रेल्वे अधिकारी/कर्मचारी चौकशीच्या घेऱ्यात किती अधिकारी/कर्मचाऱ्यांना अटक करण्यात आली ? दक्षिण मध्य रेल्वे विभागांतर्गत त्यांच्यावर कोणती कठोरात कठोर कारवाई करण्यात आली ?

🔴 डिझेल डेपोतील डिझेल घोटाळा प्रकरणातील रेकॉर्डवरील आरोपींसह त्यांना सहकार्य करणाऱ्या अधिकाऱ्यांवर कोणतीही विभागीय प्रक्रिया किंवा कार्यवाही सुरू झाली आहे की नाही ?

🔴 सुरक्षा यंत्रणांनी अटक केलेल्या/ गुंतलेल्या रेल्वे डिझेल घोटाळ्यातील अधिकारी/कर्मचाऱ्यांची नांदेड दक्षिण मध्य रेल्वे विभागाबाहेर बदली करण्यात आली आहे का ? 

🔴 दक्षिण मध्य रेल्वे प्रशासनाने पुर्णा डिझेल डेपोतील डिझेल घोटाळ्यात अटक केलेल्या/ गुंतलेल्या रेल्वे अधिकारी/कर्मचाऱ्यांवर काही आरोपपत्र दाखल केले काय किंवा त्यांच्यावर कठोर कारवाई केली आहे का ? 

🔴 पुर्णा जंक्शन रेल्वे डिझेल डेपोतील घोटाळा प्रकरणी अटक केलेल्या/ गुंतलेल्या रेल्वे अधिकारी/कर्मचाऱ्यांविरुद्ध सेवा पुस्तीकेत (रेकॉर्डमध्ये) काही नोंदी/टिप्पणी करण्यात आली होती का ?

🔴 पुर्णा रेल्वे डिझेल डेपोतील डिझेल घोटाळा प्रकरणात अटक केलेल्या/ गुंतलेल्या रेल्वे अधिकारी/कर्मचाऱ्यांची आणि त्यांच्या नातेवाईक/सहकार्यांच्या मालमत्तेची माहिती नांदेड दक्षिण मध्य प्रशासनाने गोळा केली आहे का ?

🔴 पुर्णा रेल्वे डिझेल डेपोतील (आरसीडी) डिझेल चोरी प्रकरणाची नोंद झाल्यानंतर दक्षिण मध्य रेल्वे प्रशासनाने संबंधित प्रशासनाकडून अटक केलेल्या/ गुंतलेल्या रेल्वे कर्मचाऱ्यांच्या मालमत्तेचा तपशील गोळा केला आहे का ? 

🔴 पूर्णा/नांदेड स्थानकावर कोणतेही स्टॉल/मिल्क पार्लर किंवा कोणतेही रेल्वे टेंडर पुर्णा रेल्वे डिझेल डेपोतील (आरसीडी) डिझेल चोरी प्रकरणात अटक केलेल्या/सहभागी असलेल्या रेल्वे कर्मचाऱ्यांच्या बाजूने वाटप करण्यात आले होते का ? किंवा रेल्वे कर्मचाऱ्यांच्या कुटुंबातील सदस्यांना निविदा न देण्याबाबत कोणतेही कॅटरिंग धोरण दक्षिण मध्य रेल्वे नांदेड विभागाने किंवा रेल्वे मंत्रालयाने जारी केले आहे का ?

🔴 नांदेड विभागातील रेल्वे संस्था/रेल्वे कर्मचारी कोऑपरेशन सोसायटीमध्ये कोणतेही पद भूषविलेल्या पूर्णा आरसीडी डिझेल चोरी प्रकरणातील अटक/संलग्न रेल्वे अधिकारी/कर्मचाऱ्यांची तसेच पूर्णा आरसीडी डिझेल चोरी प्रकरणाची माहिती संबंधित संस्थांना देण्यात आली होती का ?

असे एक नव्हे तर असंख्य प्रश्न पुर्णा रेल्वे डिझेल डेपोतील डिझेल घोटाळ्यानंतर सातत्याने उपस्थित होत असतांना नांदेड दक्षिण मध्य रेल्वे प्रशासनातील वरिष्ठ अधिकारी मुग गिळून गप्प का ? 'उपरवाला मेहेरबान तो बेईमान गधा पहलवान' अशी अवस्था या डिझेल घोटाळ्यातील आरोपीतांची झाल्याने ते सार्वजनिक ठिकाणी छातीठोकपणे '' हमारा बाल भी बाका नहीं हुवा " असे म्हणून या रेल्वे डिझेल डेपोतील डिझेल महाघोटाळा प्रकरणा संदर्भात सडेतोड लिखाण करणाऱ्या प्रसार माध्यमांच्या प्रतिनिधींना धमकावतांना दिसत आहेत...